O Ibader imparte un curso sobre a xestión e conservación de humidais continentais (14/07/2014)

O Instituto de Biodiversidade Agraria e Desenvolvemento Rural (Ibader) da Universidade de Santiago de Compostela celebrou durante os días 14, 15 e 16 de xullo o curso de verán da USC “Xestión e Conservación de Humidais Continentais no Marco da Estratexia da UE sobre a Biodiversidade”.

Estas xornadas están enmarcadas dentro das accións de divulgación, formación e capacitación técnica do proxecto LIFE+ TREMEDAL e enfocáronse á conservación dos humidais continentais, principalmente do norte da Península Ibérica. O obxectivo deste curso foi achegar á sociedade un diagnóstico do estado actual deste tipo de hábitats, centrándose naqueles que teñen un maior risco de desaparición ou degradación, as turbeiras e medios higrófilos, así como a presentación de accións concretas de conservación dirixidas a garantir o seu valor ecolóxico e a difundir a súa importancia.