Baieztatu da Maculinea alcon espeziea Nafarroan dagoela gaur egun (2015/10/27)

Hainbat lan egiten ari dira Nafarroan LIFE TREMEDAL proiektuko hezeguneetan, ornogabeen diagnosia eta jarraipena egiteko, GANASAk koordinaturik/antolaturik, eta  Biosfera Consultoría Medioambiental  enpresak buruturik. Datu jakingarriak eta erabilgarriak jaso dira, hezeguneen kudeaketarako, eta ezusteko atseginak ere gertatu dira espezie berezi, mehatxatu eta babestuen egoerari buruz.

Azken berri pozgarria Maculinea alcon izeneko tximeleta da. Nafarroan ez zegoen aipatua duela hogeita hamar urtetik baino gehiagotik hona, eta Jauregiaroztegiko hezegunean ugaldu dela baieztatu da, hau da, Auritzen. Tximeleta hori kimuak jandako larre menditar hezeei dago lotua, non bizitza-ziklo konplexu eta bitxia baitu. Izan ere, bizitza-ziklo hori zohikaztegiko gentziana (Gentiana pneumonanthe) izeneko landareari dago lotua. Hau da, landare hori  tximeletaren nutrizio-landarea da lehen larba-estadioetan; ondotik, inurri ostalari gisako batek (Myrmica) larba jaso behar du, inurritegira eraman, eta jatekoa emanen dio, pupa bihurtu arte eta heldua atera arte. Beraz, ziklo horrek bi gauza behar ditu: inguruan nutrizio-landare hori haztea eta inurri ostalaria egotea.

Berrikitan berrikusi egin da Espainian duen egoera, eta haren egoera ia mehatxatutzat jo da Ornogabe Mehatxatuen Atlas eta Liburu Gorrian. Nafarroan, ordea, Iberiar Penintsulan dauden bi azpiespezieak egon litezke; beraz, populazio berri hori are interesgarriagoa da. Era berean, kontuan hartuta haren bizitza-ziklo bitxia eta zer-nolako arazoak dauden espeziea kontserbatzeko, tximeleta espezie hau espezie-ikurra da Europako kontserbazioan. Horrenbestez, Jauregiaroztegi hezegunean agertu izanak agerian jartzen du nafar hezegune horrek beste natur balio bat ere baduela.

Biologoak Maculinea alcon espeziearen arrautzen eta ale helduen bila Jauregiaroztegin, Life Tremedal proiektuaren ekintzen barnean.

Gentziana horrek Maculinea alcon espeziearen arrautza du; arrautzaren xehetasuna Jauregiaroztegin.